ကျွန်တော့်ရဲ့စာမူခလေးပါ။
ပထမဆုံးလက်ထဲမှာကိုင်ဘူးတဲ့ မြတ်မြတ်နိုးနိုးရှိရတဲ့
စာမူခလေးကို မိတ်ဆွေများကိုဝေမျှရင်း ဟိုလွန်ခဲ့တဲ့၁၅နှစ်ကျော်က
ဆောင်းပါးရှည်တစ်ပုဒ်မှာထည့်ရေးဘူးတဲ့ကျွန်တော့်မိသားစုရဲ့ရီစရာ
အဖြစ်အပျက်လေးတစ်ခုကိုပြန်လည်ဆန်းသစ်လိုက်တာပါ။
ကျွန်တော်ရဲ့ပထမဆုံးပုံနှိပ်စာလုံးအဖြစ်ဖေါ်ပြခြင်းခံရတဲ့ဆောင်းပါးရှည်
ကတော့ ၁၉၉၈ ၀န်းကျင်တုန်းကကြီးပွါးရေးမဂ္ဂဇင်းမှာဖြစ်ပါတယ်။
မလေးရှားမှာနေစဉ်ရေးဖြစ်တဲ့ "ဘတ်(စ်)ကားKL(သို့)ဘတ်(စ်)ကားယဉ်ကျေးမှု"
ဆိုတဲ့ဆောင်းပါးရှည်ဖြစ်ပါတယ်။ ကျွန်တော်တို့နိုင်ငံမှာဘတ်(စ်)ကားတွေပေါ်ရောက်
အောင်အတင်းတိုးတက်နေရချိန်မှာမလေးရှားမှာတန်းစီကြတဲ့အကြောင်းအပြုသဘော
ရေးဖြစ်တဲ့ဆောင်းပါးဖြစ်ပါတယ်။ အဲဒီတုန်းကရတဲ့စာမူခလေးကိုတော့အယ်ဒီတာက
တဆင့်စာရေးဆရာကြီး အီကြာကွေးကိုကန်တော့ခဲ့ဘူးပါတယ်။
အဲဒီတုန်းကကျွန်တော့်ဆောင်းပါးပါတာကိုလည်းဖေဖေကပခုက္ကူ ကနေမလေးရှားကို
မဂ္ဂဇင်းလှမ်းပို့ပေးလိုက်မှသိရပြီးပျော်သွားခဲ့ရပါတယ်။ ၂နှစ်ဝန်းကျင်သမီးလေးရဲ့နံမည်
ကိုယူပြီး "သက်ထက်(YSO,PKU)" ကလောင်နံမည်နဲ့ရေးတာပါ။
ကျွန်တော်ဆောင်းပါးပို့ထားတာလည်းဘယ်သူ့မှမပြောဖြစ်တော့ ဆောင်းပါးထဲမှာ
ထည့်ရေးထားတဲ့ရီစရာအဖြစ်လေးကိုရေစကြိုကဦးလေးကမဂ္ဂဇင်းဖတ်ရတော့တွေ့
သွားပြီးဖေဖေ့ကိုလှမ်းပြောလို့ဖေဖေကပို့ပေးလိုက်တာပါ။
ရေးတဲ့ဆောင်းပါးကဘတ်(စ်)ကားအကြောင်းဆိုတော့မိဘတွေကိုလည်းသတိရရင်း
ထည့်ရေးလိုက်တဲ့ရီစရာအဖြစ်အပျက်လေးကတော့...
(၁၉၆၆ ၀န်းကျင်တုန်းကကျွန်တော်နဲ့မေမေတို့ကရေစကြိုမှာနေပြီး ဖေဖေကတော့
ရန်ကုန်စီးကရက်စက်ရုံမှာအလုပ်ဝင်နေပါပြီ၊ အထက်တန်းပြဆရာမဖြစ်တဲ့မေမေ့ရဲ့
နွေရာသီကျောင်းပိတ်ရက်မှာ ဖေဖေကရန်ကုန်ကိုအလည်လာခေါ်ပါတယ်၊ အညာထုံးစံ
အမျိုးတွေတအုံကြီးကောရန်ကုန်ကိုအလည်လိုက်ခဲ့ကြတာပါ။
တစ်ညနေတော့ ဖေဖေနေတဲ့ရန်ကင်း ၁၂ လုံးတန်းထိပ်ဘတ်(စ်)ကားမှတ်တိုင်မှာ
ရုပ်ရှင်သွားကြည့်ဖို့မိသားစု ၃ယောက် ၁၇ ကားစောင့်နေကြပါတယ်။ အဲဒီအချိန်တုန်း
ကနံပါတ် ၁၇ ကဘတ်(စ်)ကားအရှည်ကြီးတွေဖြစ်ပါတယ်။
မှတ်တိုင်မှာကားစောင့်နေတုန်းမေမေကဖေဖေ့ကို အလန့်တကြားပြောလိုက်တာကတော့
"ဟိုမှာကြိုးမီးလောင်နေတယ်တော့" လို့ ဖြစ်ပါတော့တယ်။
ဖေဖေကလှမ်းကြည့်လိုက်ပြီး အဲဒါကဆေးလိပ်မီးညှိဖို့ အုန်းဆံကြိုးကိုတမင်ကလာ
မီးရှို့ထားကြောင်းမသိမသာတိုးတိုးတိတ်တိတ်ရှင်းပြမှ ထိတ်လန့်နေတဲ့မေမေ
ပုံမှန်ပြန်ဖြစ်သွားရပါတော့တယ်။
ရုပ်ရှင်ပြီးလို့ရန်ကင်းတိုက်ခန်းပြန်ရောက်တော့အဲဒီအကြောင်းလေးပြန်ပြောတဲ့အခါ
ရေစကြိုကဦးလေးကျော်ဝင်းပြန်ပြောလိုက်တဲ့စကားကြောင့်မိသားစုတစ်တွေငိုအားထက်
ရယ်အားသန်ခဲ့ရပါတော့တယ်၊ ဦးလေးကျော်ဝင်းပြောလိုက်တာကတော့..
"မမမြိုင်ကမှအစ်ကိုကြီးကိုအရင်ပြောနေသေးတယ်၊ ကျွန်တော်ကငြှိမ်းနေလို့
ကွမ်းယာဆိုင်ရှင်နဲ့စကားများခဲ့ကြသေးတယ်" ဟူ၍ဘဲဖြစ်ပါတော့တယ်။)
အော်..တာဝန်သိစိတ်ရှိကြတဲ့ကျွန်တော်တို့အညာသူအညာသားတွေများပြောပါတယ်။
အခုအချိန်မှာတော့ဖေဖေလည်းကျွန်တော်တို့ကို ခွဲသွားတာဒီနေ့မှာ၎နှစ်၆လနဲ့၂၁ရက်
ရှိပါပြီ၊ မေမေကတော့အခုလာမယ့်ဧပြီလမှာ ၇၈နှစ်ပြည့်ပါမယ်၊ အငြိမ်းစားဆရာမဘ၀နဲ့
သားသမီးတွေကိုအနန္တောအနန္တငါးပါးမမေ့မလျှော့ကြအောင်အမြဲဆုံးမရင်းတရားဘာဝနာ
အလုပ်နဲ့မွေ့ပျော်နေပါတယ်။
ရေခြားမြေခြားရောက်နေကြပြီးမိဘဆွေမျိုးတွေကိုစောင့်ရှောက်ကျေးဇူးဆပ်နေတဲ့မိတ်ဆွေ
တွေ၊ ကံထူးလို့ပြည်တွင်းမှာဘဲမိဘဆွေမျိုးတွေကိုစောင့်ရှောက်ကျေးဇူးဆပ်နေခွင့်ရတဲ့မိတ်ဆွေ
တွေအားလုံးကိုမုဒိတာပွါးသာဓုခေါ်ရင်းဒီစာလေးကိုရေးဖြစ်ကြောင်းပါခင်ဗျား။
မင်းမော်လှမြင့်(YSO,PKU) 18.1.2014(facebook post).
No comments:
Post a Comment